Informacion i mirë për shëndetin
Informacioni i mirë shëndetësor është një parakusht i rëndësishëm për shëndetin. Ai kuptohet lehtë dhe pa njohuri paraprake, dhe ndihmon për të vlerësuar më mirë avantazhet dhe disavantazhet e masave ose të terapive shëndetësore. Kështu do të jeni në gjendje të merrni vendime për shëndetin tuaj që u përshtaten qëllimeve dhe vlerave tuaja personale.
Kriteret për informacion të mirë shëndetësor
Ka kritere cilësie për informacionin e mirë shëndetësor. Këto kritere zbatohen për informacionin e shkruar, konsultën me mjekun, faqet e internetit, videot, aplikacionet dhe formatet audio si radio ose podkastet.
Kushtojuni vëmendje pikave si më poshtë:
- Informacioni është shkruar në një gjuhë të thjeshtë dhe të kuptueshme.
- Përdoren informacione të përditësuara nga kërkimet shkencore dhe mjekësore (p.sh. studime).
- Tregohet data kur është krijuar përmbajtja.
- Merren parasysh dallimet në moshë dhe gjini.
- Përmbajtja paraqitet në mënyrë neutrale dhe realiste (pa reklama).
- Informacioni dhe rekomandimet janë të ndara qartë.
- Emërtohen pasiguritë.
- Përfitimet dhe rreziqet ose avantazhet dhe disavantazhet e një mase shëndetësore ose mjekësore (p.sh. ekzaminimet, trajtimet) paraqiten në mënyrë të balancuar dhe të kuptueshme.
- Tregohen metoda dhe alternativa të ndryshme trajtimi.
- Numrat paraqiten qartë përmes grafikëve ose krahasimeve. Rreziqet shprehen në terma absolute dhe ka standarde të arsyeshme (p.sh. 1 në 1000).
- Tregohet se kush e ka shkruar informacionin shëndetësor.
- Burimet, pra nga vjen informacioni, janë të dukshme.
Informacioni shëndetësor që plotëson plotësisht të gjitha kriteret do të ishte dhe ideali, por më tepër është përjashtim. Orientohuni nga fakti nëse shumica e pikave të listuara më sipër janë përmbushur ose nëse kanë marrë përgjigje ato pyetje që janë veçanërisht të rëndësishme për ju.
